Марко Постiв-Яруга ■ ЛЕМКІВСКА СТОРІНКА ■ №32, 2019-08-11

В Куровi был єм не так давно, 14 липця того рока, дужем вiдiл и стверджам, же фактычнi гостили ту люде з цiлого шырокого сьвiта.

Родина молодого баюсатого газди

Того дня iстория курiвчан не крыла ся по хыжах, вылягла на улицю. Так по правдi то в тiм селi сут лем муруваницi, жадной деревяной хыжы в Куровi юж не є, аджы Ромове мешкают в “бльоках”. Гнешнi жытелi села того дня повытiгали старинне облечыня дiдiв и прадiдiв, видно, же мают го в пошанунку и знают його вартiст. Были там кошелi-сорочкы, ногавицi хлопскы и дытячы, ци кожухы. Того дня курiвчане гонорили ся не лем одягом. На головну улицю выставлено товды дуже iншых старинных выробiв. Мож было призрiти ся рiжноманiтным хiдникам, обрусам и ручникам, была выставлена дiжка, шафлик, граблi, но и колиска з плахты. Одяг и хiдникы найчастiжше вiсiли задьiргнены на прихыжных огороджынях або розпристерты на мурках, меншы кылими вiсiли си ничым сiно на роґари.

Товды в Куровi были ищы iншы цiкавы сюрпризы. Тоты несподiванкы (декотры дiдове хыбаль з гамерицка звали iх сюрпризами) якраз находили ся по обох сторонах єдного з трьох храмiв того села. Сут три, бо в Куровi сут аж три вiроiсповiданя, але люде там жыют мирнi, не ворогуют так як то часто быват в нас, знают, же молят ся до того самого Бога. Цмонтiр єст єден, курiвска земля не робит жадной рiжницi, прийме каждого, Рома тiж. А єст iх немало, в Куровi мают свою оселю, найближе з нєй до курiвского спортового пляцу.

Гости зо Сьвiта в центрi Курова сьвяточнi привитали професор Микола Мушынка. Тот великий Курiвчан достроiл ся до ситуациi, гости ждал в полным облечыню своiх предкiв. Ходил в чузi зашмаренi на рамена, в руцi тримал прекрасне пастырскє жезло, сымвол першого курiвского бачы (вiта). Привитал iх хлiбом и сольом, так як традиция наказує. Товды на чело короводу гости з шырокого Сьвiта вышол ансамбль зо Словациi, хлопцi и дiвчата в ным выступаючы знали дорогу на спортiвни пляц, де сiльска влада зрыхтувала фестiвальову сцену. Сiдилисме на лавках, але не для вшыткых старчыло мiсця, за то декотры сiдили на земли або стояли. Вiдiли и чули вшыткы єднако, бо футбольова видовня єст на убочы.

О выступах не буду оповiдал, не за то, же не вартают того, были цiкавы. До Курова приiхали ансамблi з Украiны, Альбанii, Сербii, Баскове з Іспанii, был ансамбль зо Словациi, но и наша Кычера– органiзатор проєкту „Свiт пiд Кычером”.

Нашы прадiдове бесiдували, же хто не потрафит тiшыти ся з малых рiчы, тому великы дадут мало радости.

Хочу вам повiсти о тiм, штом в селi вiдiл, о тых выжше згаданых сюрпризах. Дахто хто там был може и повiст, же то нич такого великого, а я знам, же малы рiчы потрафлят барз втiшыти чловека.

Того дня люде, так як и я, затримували ся и ґамба сама ся iм сьмiяла до того, што там взрдiли. Нибы нич, а по мойому рiч то велика.

Перед церквом прицупнула родина молодого баюсатого газди, то были лем куклы выпханы хыбаль сiном и пристроєны в народнi одяг. Жена сiдила на сiнi при колысцi з плахты, а єй муж стоял обiк сперти на граблях. Люде при них знимали ся (робыли си фотографii), дiты зазерали до плахты, часом тым ляльом загойдали. Чудували ся, таку колыску вiдiли хыбаль першы раз. Гнеска не лем молоды мамы, жадна гнешня жена не иде до польовых робiт. Не є такой потребы, молоди ґазда в польовых роботах єст самовыстарчальны, змiну таку справил механiзацийний поступ, но и щедрiст Униii. Гнеска в поли роблят лем ґаздове, а жена з дiтми остає дома, аджы колыска з плахти в поли не єст юж никому потрiбна. Такы колыскы сут барз рiдкыма експонатами в професийных скансенах.

Праня у потоці і біліня леняного полотна

За церквом был бiльши пляц, на ним ґаздували дiты. Напевно пристроiли го iм iх родиче. Вздрiл єм там два робочы округы, по єднi странi „потока” было Праня на потоцi, а на другi Бiлiня леняного полотна. За потiк робила там долга фолiя. Хвилюм там постоял и стверджам, же дiти знали як iх дiдове тото робили. Дiвчата прали, а хлопец або воду iм доносил, або пральником толк по намоченiм и намыдленiм полотнi. Одягнены были в народны строї, што тiж не было без значыня. Мусiл єм заiхати аж до Курова, жебы вiдiти як нашы дiдове бiлили полотно. Давнiжше прецiн в каждiм лемкiвскым селi пряли, найбiльше в Филипiвку, а пак з тых напряденых ниток робили полотно, котре потiм треба было ищы выбiлити, жебы не было такє сiре. За то маме Бiличну и Блiхнарку, а част Горлиц до гнеска зовеме Блiхом (идеме на Блiх), але, на жаль, в нас не є юж люды, котры знали бы як тоты бiлены полотна над водом были розпристераны. Тепер юж знам, но бо в нас прецiн мусiли так само iх пристерати, того дня в Мушинцi оповiдала нам о тiм 94-лiтня Лемкыня. В Куровi вiдiл єм, же горцi, граблi, косы, колыскы и iнше знарядя мали такы самы як нашы дiдове, адже нашы бабцi леняне полотно мусiли так само бiлити як куровчане. Ту на передцерковным парковиску вдало перешмарено мiст з давнины до зараня, мило было позерати на тых маленькых „дiдiв-прадiдiв”.

Курiвчане того дня шыроко отворили дверi и до свого домашнього Музею. Оказало ся, же засновник юж не жыє, зато гости опроваджали його дiты и внукы. Од iсториi гын было аж густо, кажда закутинка тематычнi iнакше была заґаздувана, выкорыстани был там кажди квадратни центометер пiдлогы и сьцiн. Мене цiкавило вшытко. Не збрешу, коли повiм, же вшыткого было там дос, ничого не бракло, было там вшытко, чого на селi нашы дiдове лем товды потрiбували. Было дуже барз мi добрi знаного старинного знарядя нашых дiдiв-прадiдiв, але были и такы рiчы, котрых в нас хоцбысте и зо сьвiчком ци лампашом глядали, не найдете. Зьвiдал єм ся ци добрi си мiркую, ци то строї и реквiзыты колядникiв, бо колисим вiдiв штоси такє на старых фотографiях. Потвердили и додали, же они и гнеска сут выкорыстуваны, же колядникы фурт си iх в них выпожычают. То добрi, же тот куровчаньскi невеликi а Великi Музей дає дашто з себе, не лем тым, якы до нього зайдут од великого сьвята. В Куровi в час Рiздвяных Сьвят частка тых музейных експонатiв ходит з колядниками од хыжы до хыжы, то хыбаль найлiпша рекляма для музею.

Повiм вам ищы о єднi стариннi рiчы, котра там в Куровi мала рiзны формы. Думам о iдлi, бесiдую о нiм з премедитацийом, но бо думам, же тота форма iсториi дакого з вас за рiк до Курова може притягнути. Кєд будете в Креницi, а Сьвiт пiд Кычером зас заiхат до Курова, заiхайте там и вы. Будете мати змогу спрiбувати iдла и нашых прадiдiв. Не бiйте ся, нич не было там застарiлого и нич а нич ся не змарнiло. Вшытко сьвiжо наварили и напекли курiвчаньскы ґаздынi. Вшытко было смачне, старинны были лем переписы. Вшытко мi смакувало, коштувал єм перогiв зо сливок и тых з брындзьом, мачанку барз захваляла моя жена. Няньо тiвко о нi бесiдували, о мастилi то юж ани не спомну.

За рiк, коли Сьвiт зас заходил буде до Курова и я там хочу зайти, обовязково, того рока вшыткогом прецiн не вiдiл, а ґаздынi напевно зрыхтуют ищы дакє iнше стародавне iдло.

Поділитися:

Категорії : Лемки

Схожі статті

Напишіть відгук

Ваша пошт@ не публікуватиметься. Обов’язкові поля позначені *

*
*