Марко Постiв-Яруга ■ ГРОМАДА ■ №6, 2019-02-10

Штоправда, жовтень 2018 рока минул, але за то, же ани поезия, ани сотны роковины Фльоринской Руской Народной Республикы ищы прецiн не минули, допис тот, хоц не был помiщени в дакым осiнным номерi газеты, надрукувани може быти и тепер. Поезия прецiн ниґда ся не старiє, а сьвяткуваня 100 рiчницi народин II Rzeczypospolitej Polski тiж ищы ся не скiнчыло. Наша Фльоринскa Республика была дуже менша и барз скоро зчезла з лиця землi (але 100 рокiв тому iснувала), а Польща товды ищы ани добрi не окряла.

13 жовтня 2018 рока «Лемкiвска творча осiн» гостила во Фльоринцi. Любителi лемкiвской поезиi зiхали до Фльоринкы зато, же ХХVІ «Лемкiвска творча осiн» присьвячена была столiтю народин Руской Народной Республикы, но и 50 рiчницi смерти великого Лемка – Епiфанiя Дровняка (Никифора Криницкого).

В притворi фльоринской церкви коротiцко помолилисме ся, жебы з Богом, так по лемкiвскы, зачати урочысте наше стояня на мiсци товдышнього Вiча. На жаль, не было тiлко народу, што 5 грудня 1918 р., была лем мала жмiнка люди, але, як бесiдує стара лемкiвска пословиця, тота мала грудка то «сам сыр»?

Переiхалисме до Бiлцаревы. Помолилисме ся в церкви и пак з задумом станулисме над могилом отця Теофiля Качмарчыка – пароха Бiлцаревы и няня Ярослава Качмарчыка, лемкiвского премєра. Смотрячы на грiб и на клебанiю о. Качмарчыка, выслухалисме слово бiлцаревянина Петра Трохановского. Разом з делегацийом мiсцевой влады (вiйта гмiны Грибiв), поклалисме там квiтя и запалилисме сьвiчкы. 100 рокiв тому душом вiч, органiзуваных в нашых селах, были греко-католицкы єгомосьцi, але того дня во Фльоринцi не было жадного, православны тiж были неприсутны.

На головну част «Лемкiвской творчой осени», на стрiчу з лемкiвском поезийом, вернулисме до Фльоринкы, до сали мiсцевого Ґмiнного осередка культуры згiднi з задумом органiзаторiв – адже Стоваришыня Лемкiв и Стоваришыня «Руска Бурса» в Ґорлицях. Перше слово належало до Петра Трохановского-Мурянкы, представил нам гоноровых госты ХХVІ «Лемкiвской творчой осени» и пояснил, чом того рока не є з нами лемкiвскых-русинскых творцiв з Украiны и Словациi.

За президияльным столом сiдили: д-р габ. Олена Дуць-Файфер з Ягєлонского унiверситету; Італиянка д-р Силвя Брунi з Унiверситету в Падвi; д-р Рустан М. Бегеулов з Державного карачайского унiверситету в Карачайску (Карачайi – то такы «Лемкы» Кавказу); д-р фiльозофii Павло Коробчак з Вроцлавского унiверситету, Вiтольд Калiньский – член Товариства лiтерацкого iм. Циприяна Норвiда; но и згадувани Петро Трохановский- Мурянка.

Слово о Рускiй Народнiй Республицi проголосила панi Олена Дуць-Файфер. Бесiдувала о вiчах в Гладышовi, Сьнiтницi, Креници и Сяноці, але о Фльоринцi и Бiлцаревi найбiльше. Оповiдала як то нашы предкы прiбували сами собом рядити, же хотiли быти не лем хлопами, але и панами землi, на котрi од поколiн жыли. Часто покликували ся на деклярацию президента США Вудро Вiльсона (обнимала 14 тез, якы помочы мали запровадити мир на сьвiтi), же глядали гiдного мiсця для себе в полiтычнi Європi на ново творенi. Пята теза декларациi президента Вiльсона бесiдувала о тiм, же рiшаня вшыткых незгiдносты, дотыкаючых суверенiтету колоняльных спорiв, мают быти основаны на принципах цiлковитой свободы, чыстосердечности и абсолютной безсторонности. Лемкы добрi знали, же Вiльсон хотiл, жебы iнтересы мiсцевого населеня, навет так малочысленного як наше, мали таку саму вагу як потребы влады, котра ним рядит. В шестi зас мова єст о вызволiню вшыткых рускых територий, а в десятi о тiм, же народы Австро-Венгриi в Лiгi Наций мают мати своiх представникiв, має то загварантувати австрийскє право – адже вiрили, же мова ту о шырокi автономii и для нашого народа.

Нашы предкы сьвятi вiрили в тото, же Вiльсон, хоц не дал iм так як Полякам осiбной тезы (тринадцета), 8 стычня 1918 р., пишучы декларацию, думал и о них, же мают такє само право до розвиваня нацйональных и газдiвскых крыл як и сусiдны народы.

Думам, же 5 грудня 1918 р. во Фльоринцi не творено осiбной державы, товды створено лем владу, котра мала нами рядити и зато Полякы початково не бороздили а помагали. Комiсар Польской лiквiдацийной комiсиi з Грибова Казимiр Рамулт для потреб нашой влады дарувал дiм, а мiлiциi 50 єднострiльных карабинiв и єден машыновий, амунiцию, очывидно, тiж. Спiвпраця скоро ся скiнчыла, 13 грудня 1918 рока премєр Ярослав Качмарчык на сяноцкым вiче оголосил, же Австриякы ани Полякы, ци Мадяре не будут нами рядити. Барз добрi знали, же сами не сут годны створити державы, же мусят ся до когоси приєднати, а же до Польщы належати не хотiли, глядали iншого сопутника. Росия, до якой бiльшости было хыбаль товды найближе, не была певном державом, а Украiна нияк ся iм не подабала (бо ворогувала з Росийом), за то навязали спiвпрацю з Карпаторуском Радом Антонiя Бескыда з Пряшова. В справi приєднаня нас до Чехословациi з президентом Томашом Масариком бесiдувал Михав Юрчакевич и Александер Тиханский. В Празi не нашли ничого, крiм зрозумiня. Полякы на нич не чекали юж, в прилемкiвскых мiстечках (польскых) створили мiцны осередкы влады, вспертой польскым войском и полiцийом. В нашых селах мiсце лемкiвской мiлициi заняла польска полiция, а польскє войско обставило стару польско-мадярску границю. Полякы задбали о то, жебы нашы хлопцi не переходили до Чехословациi, жебы не втiкали там перед вербунком до польской армii.

Справа приєднаня нас до Чехословациi пiднесена была и на покойовi конференциi в Версалю, домагали ся того Михав Юрчакевич, Александер Тиханский и Ярослав Качмарчык. Там тiж ничого не звоювали. Юрчакевича Полякы загарештували заразiцька як лем вернул з Парижа. Лемкы одповiли новым зiздом до Фльоринкы. 12 марця 1920 р. на вiче Ярослава Качмарчыка обрано новым президентом и рiшено, же нашом головном цiльом дале єст приєднаня до Чехословациi. Полякы загарештували Качмарчыка и цiли його ґабiнет, оскаржено iх о антипольску дiяльнiст, але польскi суд уневиннил iх. Узнано, же бороли ся о тото само, што и Полякы, о право до самостановлiня. Польщы зрадити прецiн не зрадили, не могли, ничого єй не присiгали, што лем творила ся, так само як наша Руска Народна Республика. Но штож, малисме такы самы права як iншы сусiдскы народы, але право самостановлiня нашого народа програло з правом Полякiв и Чехiв – мiцнiжшых сусiдiв.

По доповiди – дискусиi не было, од разу залунала поезия, своiма вершами перши салю наповнил Петро Мурянка, отворил пред нами свою шестикрылу поетичну душу. Своi стихы не лем рецитувал, верш о шкавраночку засьпiвал. Вершом Мурянкы почала тiж панi Силвя Брунi, котра перевела 40 нашых стихiв на iталяньску мову. Нич єм не розумiв, але мелодийнiст мовы и iнтонация голосу лекторкы зробило своє. Рецитация не лем мi ся подабала, сам Мурянка ствердил, же в iталяньскi мовi верш тот барже ся му подабат як в оригиналi. Зачытала нам ищы два, верш Владислава Грабана «Гуманiтас» (Петро Трохановский доповiл товды, же Грабан – то єден з засновникiв «Лемкiвской твор- чой осени»), но и верш Олены Дуць-Файфер.

Пак пан д-р Рустан М. Бегеулов признал, же не пише вершiв, але дал ся зiмати на гачык нашой поезиi. Бесiдувал по росийскы зато, же мы карачайского не знаме, сам єм ся собi чудувал, же правi вшытком розумiл. В певным моментi панi Олена Дуць-Файфер єднак не вытримала (коли бесiда была о нi) и сама почала переводити, хотiла мати певнiст, же добрi вшытко розумiєме. Правду повiсти, то часом аджи я єм чул, же не переводит вшыткого точнi. Рустан Бегеулов был вынятковым гостьом, признал, же наша iстория и поезия взяла го в полон, чуло ся, же тiсячы кiльометры и мова не сут в силi нас роздiлити. И я повiрил єм, же Карачайi и Лемкы мают штоси спiльного.

Во Фльоринцi кажди гiст (крiм того выжче згаданого) рецитувал вершы, вшыкых слухалисме з великом увагом и задумом. Мене зворушыл верш д-ра Павла Коробчака, котри присьвятил памяти свойой мамы, чул єм го першы раз. Была в нiм туга, але и тепло. По самы берегы выповнени был добротом, так як особа, котрi был присьвячени. Выкликал в ґомi спомины о особi, котрум мал приємнiст знати. Панi доктор Ірена Коробчак была вшыткым людям приязна, тепла, Она усьмiху, доброго слова и помочы никому не жалувала, а радiстьом заражала iншых. То была правдивi добра людина, Людина-Сонце.

Пак присутных сьпiвом обдарувала горлицка «Терочка», выступила в мiцно окроєным складi. Музыканты были в комплетi, но бо як были гушлi (Андрия Трохановского), гармонiя (Ігоря Трохановского) и басы (Миколая Грича), то были вшыткы. Правду повiсти, то кус бракувало мi лем цимбалiв, но и шкодувал єм, же гушлi молкли, коли гудак сьпiвал разом з квартетом дiвчат.

Шкода, же было нас так мало, бо кажда част фльоринского сьвата розсiвала тiлко позитивной енергii, же мож ньом было обдiлити соткы осiб, а нас неорганiзаторiв мож было порахувати на пальцях рук.

Може 5 грудня 2018 р. буде веце люди, товды на мiсци фльоринского вiче урочысто має быти поставлени камiн з пропамятном таблицьом.

Знате, так си думам, 100 рокiв тому не было такых можливости як гнеска, не мали телефонiв, Skype’a, Facebook’a ани Twitterа, а до Фльоринкы на вiче пришло за першым разом пятсто, за другым шiстсто нашых предкiв, а на гладышiвскым могло быти адже и зо два тiсячы люди. Гнеска нияко хыбаль щытити ся нам тамтым натолпом люди, коли 13 жовтня 2018 рока делегация Лемкiв была така мала. Такє мале чысло злi о нас сьвiдчыт и вказує, же не є в нас готовости до служiня выжшым iдеям, бо не думам, жебы органiзаторам не залежало на натолпi народу такым як на вiчах сто рокiв тому. Мерзит ня «штука для штукы», от лем такє «одфайкуваня iмпрезы». Ци не лiпше былобы, якбы того роду iнiциятивы пiднимали и вели спiльнi вшыткы нашы органiзациi? Вiрю, же медже нами сут ищы мудры люде, же ищы жыє в нас дiдова пословиця бесiдуюча о тiм, же в суперечках то мудрiжшы мудрi уступуют. Цiкавит ня, ци годнисме ся ищы зєднати для выщой справы? Бiльшой од добра нашой спiльной Лемковини-Лемкiвщыны хыбаль не є. М

Поділитися: