Олександр Маслей ■ ЛЕМКІВСКА СТОРІНКА ■ 2011-06-10
{mosimage}
Вибрав єм ся до Вільхівця з Горлиц дідня през Липну – Довге – Граб і Жидівске. Хтів єм кус посмотри-ти, як на яр виглядат Лемківщина. Бива крас хвиля, хоц о самі дорозі не мож того повісти, не сподівав єм ся, што буде так витолчена през тото вивожиня “лемківского дирва”.
Та і хтів єм зазрити до Граба, побесідувати з остатніма нашима “могіканами”. В Довгим затримав єм ся побіч “Двери”, яки ОЛ поставило в пропалих селах. Є на них коротка історія села з планом колишньой забудови. Дорогу од Вишовадки до Граба поправили.
В Грабі зашов єм до Павелчаків, оповіли мі хто в селі гмер і хто виїхав до Гамерики. До Жидівского од Ожинной не вїхат ся, міст зорвани іщи од минулорічной повині. Вернув єм на Святкову. Там при дорозі велики таблиці остеригают “звільний автом – медведі”, далі “звільний автом – вовки”. Кус єм ся встрашив, йой в Грабі до ліса на гриби не підеш. А потім подумав єм, та в тим лісі лісничим є Болько Баволяк. Хце мати спокій і страшит люди. В Крампні гарді одремонтували церкву.
Дорога до Вільхівця зас лем полатана, хоц в тім році здолали перед кермешом.
В Вільхівци нове “смотриня” з духом часів. На дорозі служби керуют рухом. Намет велич єдного з броварів і крами зо вшитким, зачинат бракувати пляцу. В сулі новий єґомосць о. Христофор Блажеєвский і новий шолтис Зенон Федак. “Кермешову” Службу Божу кінчит процесія.
Потім урочисте відкритя ХХІ Лемківского кермешу, привитаня госьців. Програму веде Славко Гойсак. На сцені ансамбль “Вільшня” Болька Баволяка з Полян. Далі “Каська” з Дембовця, тріо “А.І.М.А” з Маластова, ансамбль пісні и танцю “Тарка” зо Словаччини і конкурси співачи для молоди.
На увагу заслуговує доповід Божени Пацтви “Памят про табір в Явожні”, в якій переслідіва історію концтабору від закладаня німцями в 1943 р. KL Auschwitz – Arbeitslager “Neu-Dachs” nr 147 през ЦОП Явожно, відкритя памятника – відкривали його президенти Польщи Александер Кваснєвский і України Леонід Кучма, кінчаючи словами голови ОУП Петра Тими на 60 річницю акції “Вісла” в Явожні, яки міцно ту зазвучали.
“В тим лісі, де уж нихто не кричит, лем безсильна розпука наша”… Повні текст доповіді в спеціальним виданю газети “Кермешові вісти”.
Далі глядачів бавили ансамбль пісні и танцю “Ослав’яни” з Мокрого, “Рівнянє” з Рувного, Жуковянє з Устрик і рок-фолк-джаз “Дулярови братя” з Горлиц.
Організатором кермешу є ОЛ Головна управа і гурток ОЛ в Вільхівци. Кермеш має свою вірну публику, яка штороку ту зазерат. А організатори здобувают нових спонсорів.
Голова ОЛ Штефан Гладик і секретар Еміль Гойсак потихи організували “Ватру”, бесідуючи з керивниками колективів.
Миколай Ґабло дав мі скоштувати клаґаной бриндзі, як обіцяв ґлони на ювілейним кермеши. Сідили сме за його камяним столом на подвірю, побіч нас сідив його крас пес Амар, а з далека несло за Горб і Добанец кермешових музикантів сьпів. А Миколай Ґабло запросив ня за рік на наступни кермеш і свіжу бриндзю.
“Наше слово” №24, 12 червня 2011 року {moscomment}
