Марко Постів-Яруга ■ ЛЕМКІВСКА СТОРІНКА ■ №45, 2020-11-08

Наша церков юж єст гарда, але за недолго ищы ся краснiйшом стане. Закля повiм, чом гладышiвска церков буде ищы краснiйшом, оповiм як то ся стало, же єй в селi маме. Єст молодом сьвятиньом, єй будова зачала ся в 1937 роцi, но и до недавна не мала ищы iконостасу. ІІ Сьвiтова вiйна и вымушений насильний ексодус нашых предкiв сут винны тому, же в серединi выглядат якбы теслi што лем з нєй вышли. Нас в селi правi же юж не было (по 47′ остали лем тоты, котры мали гамерицкє громадянство або были етатовыма лiсныма робiтниками), а краса новозбудуваной церкви каждого, хто до села пришол, хоц на хвилю задержала и добрi о нас сьвідчыла. Она и гнеска зiр каждого годна затримати, хоц бы лем на хвилю, кєд цiнит красу. Кєд любит лем грошы и так нас мусит шанувати, видит прецiн, же она вартат каждых пiнязы. Краса храму сама бесiдує, же быле хто нашой церкви не мiг збудувати.

Фото з Вікіпедії

Історія церкви

Кєд даколи до нєй зашли-сте, кєд даяк звязаны-сте з Гладышовом, то знате, же бесiдую о церкви Вознесiня Господнього. Наш храм на декотрых мапах и в неєднiм туристычнiм провiднику называни єст церквом св. Архистратига Михаiла, а так не єст. Такого покровителя мала старша, тіж деревяна, гладышiвска церков, котра стояла на цмонтернi горi (iснуваня єй згадує пропамятний крест), але в 1915 роцi згорiла. Пiдкурили єй мадярскы воякы, жебы выгнати москальскых жовдакiв, котрых ниґда в нi не было. Скоро ціла заняла ся огньом. Гладышовяне з горiючой церкви встигли вынести лем бiчний олтар, пак юж воякы никого до середины не пустили. Перенесено го до каплицi св. Йоана Предтечы (гнеска молят ся в нi православны). Од 1938 рока, находит ся в церкви Вознесiня Господнього (вздрите го по лiвi сторонi iконостасу).  Має в собi iкону Розпятя, котра барз подiбна єст до чудотворного образу з головного олтаря костела недалекой Кобылянкы. Давно тому, ищы за небiщкы Австриi, гладышовяне до кобыляньского храму ходили на кєрмешы.

Вiйна скоро одышла далеко на схiд (в маю 1915 рока), але долго ищы неєден гладышовянин воювал на iталiйскым фронтi або был в Талергофi. Зрештом, на час славной горлицкой битвы (2 мая 1915 рока) вшыткых жытелiв Гладышова выселено аж пiд Лиманову. Но и, на жаль, од тамале по кiлькох мiсяцях до рiдного села не вшыткы юж вернули. Неєден з тых, котры вернули ся, мусiл нову хыжу будувати, бо стара згорiла так як скорше церков. Дякувати Богу, товды в селi хоц церкви юж не было, гладышовяне мали ся де молити. В серединi села од 1857 рока стояла каплиця. Находила ся блиско клебаніi, єґомосьць там одправляли будны заупокiйны Службы Божы – аджи и товды, коли церков в селi ищы стояла. Каплиця гладышовянам за церков служыла до 1938 рока. Нови храм в селi збудувано не на старiм церквиску, а блиско клебаніi головнi за то, же гладышiвскi єґомосьць были iнвалiдом Першой сьвiтовой вiйны, жебы єґомосьць мали ближше до церкви – в селi вшыткы єґомосьця шанували, адже и Полякы.

Церква збудувана з околичного дерева

В Гладышовi маме деревяну церков, але од родичiв и бабы Параскы знам, же декотры товдышнi гладышовяне хотiли мурувану, таку од давна мал юж недалекi Маластiв и сусiднi Смерековец, а од 1916 рока и Панкна. Адже нич в тiм чудного, же и они, жыючы медже тыма селами, не хотiли быти гiршыма. Но и о мали фиґєль так ся не стало. Повiдали, же єден барз богати Жыд кєд вздрiл згромаджене дерево, а было здоровiцькє, долге и простiськє, самы прекрасны и шырокы швалi, хотiл го на свiй кошт до свого тартаку забрати. Вiрте на слово, барз добрi видно іх и гнеска. Дерево, з якого збудувано гладышiвскi храм, выросло в околичных лiсах. Каждий товдышний ґазда мал свiй лiс. Баба Параска бесiдували, же Дiдо Михал, хоц в Маґурi мали штырi гектарi красного грубого и густого лiса (не было в нім ани єдной ялицi, котра не мала бы двох кубикiв), не стяли свого дерева, бо шкода. Не думайте си зьлi о моiм Дiдi, Они на церков ничого бы не пошкодували. Бесiдували, же сут юж стары (кєд женили ся мали 60 рокiв, а баба Параска лем 24), же лiс єст iхнiм банком, хочут жебы лiсний капітал рiс для iхнiх дiти. Дiдо Михал добрi си мiркували, знали, же лiсний капітал не здевалюує так як по І Сьвiтовi австрийска, ци пак и польска марка. Лем, же не предвiдiли, же зожре го номен омен польска людова держава. Моi Дiдо дерево на церков а якже дали, купили го в державнiм лiсi. Знате, не чудує ня тото, же Жыдови сподабало ся наше лемкiвскє дерево и не йому першому. Жыдам з Буды або Пешту (по гнешньому з Будапешту), барз сподабали ся волiвчаньскы дерева, де замовили велику кiлькiст ґонтiв.[1] Наш Жыд обiцял нашым ґаздам за тото дерево привести тiлко цеглы, кiлко треба буде на збудуваня нового храму (цегельню тiж хыбаль мал свою). Бiльшiст была єднак такi замiнi противна, нич не помагало и тото, же обiцял заплатити за роботу майштрiв, котры будут тягнути в гору церковны муры. Выдавало бы ся, же то iнтерес добри для обох стран, але гладышовяне подумали, же прадiды молили ся в деревянi церкви и они тiж лем в деревянi хочут Бога молити о кращу долю. Деревяну маме и за то, же бiльшiст не могла собi уявити того, як то мали бы ся молити в церкви выставленi през Жыда, то нич, же за iх грошы (а радше треба ту радити, же за iх дерево).

Фото з Вікіпедії

Напевно дехто з вас сам юж переконал ся, же туристичны провiдникы барз часто о нашi церкви цiлой правды не повідают. Часом прочытате там, же то костел св. Йоана Предтечы (Римо-католикы справді так нашу церков перекстили и за то римо-католицка парафiя кєрмеш має 24 червця – на латиньского Йоана Предтечу). Правда, часом єст згадка (але не все), же тот нiбы то костел św. Jana Chrzciciela  єст и церквом Вознесiня Господнього. З неєдного провiдника довiдате ся ищы о iншi неточности, же вознесли єй гуцульскы майштрове, а тото тiж треба медже байкы гложыти. Наша церков лем навязує до гуцульского стилю, але мiсцевы майштрове єй будували, а пляны сут дiлом львiвского архiтекта и походят з Будiвельного Вiддiлу Краєвого Району Кооперативно-iнжинєрного у Львовi. Заховали ся оригiнальны пляны будовы нашой церкви, быти може єст то проєкт самого Євгена Нагiрного. На жаль, печаткы сут юж маловыразны, тяжкы до одшыфруваня, барз пояснiли, а пiдпис, хоц мiцно в папери увiчнений, то малочытельний (не знам пiдпису Нагiрного).

Спір о крест

Што цiкаве, на оригiналах плянiв будовы гладышiвского храму увiчнено спiр медже парохом а комiтетом будовы церкви. Несписана iстория, жыюча в памяти нашых предкiв, голосила, же єґомосьць были за крестами єднораменныма, а люде, и то не лем тоты з комiтету будовы, за трираменныма. Вшыткы и гнет пiшли по розум до головы (за долго не блудили в густiм лiсi суперечок) и дішли до згоды. За то в гладышiвскi церкви маме трираменний крест лем над найвыжшом баньом (головном). Решта крестiв згiдна єст з проєктом, адже сут єднораменныма крестами. На єднiм з плянiв (на Видi з переду) видиме, же хтоси олувком домалювал трираменний, але не скiсни, крест и над входом, а не на вершку церкви, де гнеска го видиме.

Список гладышовян

Маме тiж барз цiкаву величезну таблицю, на котрi єґомосьць о. Андрий Злупко выписали вшыткых гладышовян жертвующых и трудящых ся при будові того храму. На кiнци записали аджи тых (двадцет осiб), котры нияк и ничым не всперли будовы церкви. Тота таблиця долго вiсiла в церкви в сьвятилищи. Гладышовянів подiлено в нi не лем на тых, котры дали, и на тых, котры в ничiм до будовы церкви ся неприслужыли. Тоты, котры в даякi спосiб доложыли ся до будовы, подiлены сут на важніжшых, котры барз ся прислужыли (записаны сут червеном азбуком так як и єґомосьць – єст iх пятнадцетеро), и на такых, котры кус менше або ищы менше пожертвували на будову нового храму. На червено запысаны (крiм пароха) то:  провiзоры, церкiвникы, члены комiтету будовы гладышiвской церкви и тоты, котры были єй найбiльшыма ктиторями. Меншых благодiтели, а тых єст найвеце, єґомосьць записали юж лем чорным атраментом и подiлили на три пiдгрупы:

– на бiльшых серед меншыма (46); 

– середнiх медже меншыма (30);

– но и на тых найменшых благодiтели (55). 

Такы назвы надал єм тым підгрупам сам. Цiлiст обведена єст рамком, в котрi найкращы квiткы сут гором, при тых особах на червено записаных. Кус меншы и менше червены сут намалюваны по боках при тых важнiжшых особах на червено записаных. Такы самы сут при першi групi дос ищы щедрых, але менше благодiтели нашого храму, котры юж лем на чорно сут записаны. Они хыбаль сут значнiйшы од тых, котрых пак нижше тіж на чорно записано, але юж без квiточкiв по боках, при них бiчну рамку спису творит лем сама чорна криска. А, забыл бым, сут ищы два меншы и кус iншы, чорны квiточкы (маме iх на кінци), котры так чуднi си там роснут – былином до горы. „Роснут” квітьом на долину при тых особах, котры в ничiм и хыбаль нияк непричинили ся до будовы нашой церкви.

Не знам, ци єґомосьць записали iх для вiчности, ци в тот спосiб хотiли лем iх засоромити и ищы за жытя покарати. А може, записуючы iх назвиска, задбали о тото, же кєд даколи ищы буде дака збiрка на суспiльны справы, товды кажди дашто од себе даст. Тот, хто не ма з чого дати, мал бы товды од богатшого пожычыти и за себе дати.

***                                                               

[1]  Таку цiкаву вiстку нашол єм в книжцi бывшого вiзитатора шкiл Горлицкого повiту:  Seweryn Udziela Ziemia Łemkowska przed półwieczem. Zapiski i wspomnienia z lat 1888-1893 z 12 rycinami , Lwów 1934,  замiщено єй в книжцi выданi в кросняньскiм выдавництвi: Łemkowie w dawnych opisach, Oficyna Wydawnicza „Ruthenic Art” Krosno 2015, с. 316

Поділитися:

Категорії : Історія, Лемки

Схожі статті

Залишити відповідь

Ваша e-mail адреса не оприлюднюватиметься. Обов’язкові поля позначені *

*
*