Марко Постiв-Яруга ■ ЛЕМКІВСЬКА СТОРІНКА ■ №2, 2019-01-13

З наголовком Кумового допису о «ХХVІ Лемкiвскi творчi осени» згаджам ся в сто процентах, она и в моiх очах єст и чудна, и чудова.

Заклям го не прочытал, не знал єм чом минулорiчна поетычна наша
«Лемкiвска творча осiн» заперла ся лем в єдным дни. Прецiн такi ювiлей, якому была присьвячена, трафлят ся раз на сто рокiв, адже по мойому «Лемкiвска творча осiн» мала бы трывати довше як вшыткы дотля. Сподiвал єм ся, же сьваткувати будеме хоцкi зо три дны, а не два як все остатньо, а така велика, ювилейна и сьваточна зачала ся и скiнчила номен омен 13 жовтня 2018 р. В дописi Кум доносят, же стало ся так: «зо взгляду на фонды, якы ся нам дурнувато сховзли». Якыса причына того дурнуватого зховзнiня мусiла быти, бо фонды сами прецiн ся не сховзли. Куме, може, то вина тых як сте сами написали: «нашых – назвийме – iнакше думаючых», лем сте того не написали. Демко Трохановскiй впрост зове iх Украiнцями и сугерує, же тоты нашы Лемкы, для ясности тiж назвийме iх iнакше думаючыма, адже тоты не зо Стоваришыня «Руска Бурса» и не з лiгницкого Стоваришыня Лемкiв, не творят лемкiвскых органiзаций(2).

Давнiжше бесiдували: «Puść Rusina na Rusina», а гнеска хыбал треба бесiдувати о напущаню Лемка на Лемка. Хоц – нi, бо в дописi Демка чытаме: «Лемкiвскы представникы (Демко Трохановскiй и Марта Ватраль – ред.) пояснили в парляментi, што посеред вельох добрых примiрiв пiдтримуваня лемкiвской етнiчной меншыны польском державом днес Русины в Польщы змагают ся м.iн. з перманентном украiнiзацийом, на котру не все реагуют державны урядникы рiжных щаблiв.3 Адже лiпше буде бесiдувати о напущаню Русина на Лемка, а помагати в тiм мали бы iм польскы: «державны урядникы рiжных щаблiв», а фраси того не роблят.

Позвольте, же ся ищы зьвiдам Вас о такє єдно, што нияк не можу зрозумiти, повiчте мi чом то деякы твердят, же Лемко не може быти Лемком и Украiнцьом? Повiчте Ґуралови, Сьльонзакови або дакому Кашубови, же вiн не Ґураль, не Сьльонзак, не Кашуб а лем Поляк, цiкавим што ся буде дiяло. Я не одважыл бым ся зьвiдати.

Куме, думам, же барже повинна болiти Вас не наша, адже «iнакше думаючых», присутнiст во Фльоринцi, а неприсутнiст того як сами бесiдуєте хто з Украiни и Словациi того дня: «прилетiл бы до Лемковины на крылах». Знам, якбы могли, прилетiли бы, якбы мали крыла. Жалую, же iх не было.

Куме, як чытате тот допис, а думам, же так, то юж знате, же не во вшыткым ся з Вами не згаджам. Не гнiвам ся, же сте ня назвали iнакше думаючым, бо справдi барз часто думам iнакше. Знате, нияк не можу зрозумiти чом ся тiшите з того, же на сали того дня было та мало гнешнiх фльоринчан. По мойому скромна делегация польской мiсцевой влады не была: «нашом моральном побiдом», а на опакы. Но штож, побесiдувати си можеме, папiр вшытко прийме. Колюмбом не буду и Гамерикы не одкрию, коли повiм, же мене не тiшыт тото, што тiшыт Вас. Навет, коли фактычнi было бы так як пишете: «Ім (адже гнешнiм жытелям Фльоринкы, Полякам – ред.) уж надост надоiли самы афiшы iнформуючы о подii. І для нас то уж было сатисфакцийом». Знате навет як так бы дiйсно было, мене тото би не сатисфакцийонувало, адже мам наступни довiд на то, же фактычнi iнакше думам.

Пишете, же доповiд панi д-р габ. Олены Дуць-Файфер о Фльоринскi Республицi електризувала («Дакотрыма може дакус и сiпало, но але електрика в такых ситуациях є тiж потрiбна»). Правду бесiдуючы, то жадной електрикы в тi доповiди не было. Так, кус сiпало, але лем товды як прелегентка минала ся з правдом. Раз коли бесiдувала о выжшости нашой Республикы над Команецком (товды и Вы сте зареагували, Вами тiж сiпало?), а другi раз коли твердила, же в часах нашой Республикы Росиi юж не было. Росия была товды Российском Совєтском Республиком («Rosją Radziecką або Rosją Sowiecką»), СССР покликано до жытя aж 30 грудня 1922 рока. Iншой єм думкы и што до оцiны той части фльориньского Сьвата, по мойому панi доктор не лем, же ани не: «бесiдувала дакус за долго (…)», ани тым бiльше «дакус за мудро як на тото зобраня». Мене хыбаль Куме не мате за дурного, за першого лiпшого кыя, ани Полякiв, якы пришли і того слухали, хыбаль тiж нi, то была мiсцева влада.

Правду повiсти, то електрика справдi была, то дакыма особами сiпала наша присутнiст. Выразнi пронды тоты чул єм юж на добри ден при зниманю першой фотографii, а другi раз при гостиннi трапезi в Камяннi.

Правда, признаю и потверджам, же и в моi оцiнi: «Тота горстка днешнiх фльоринчан, што ся явила, была єднако захоплена (за довгы рокы навчыл єм ся тото спостерiгати) тым, што сме презентували». А ле од разу мушу ту жыцю дехтю додати до Вашого барз доброго самозадоволiня, бо наступний Ваш вывiд єст стрiлом в плiт. А дже выходит на то, же ищы веце рокiв потрiбуєте вчыти ся того спостерiганя. Початок Вашого дальшого выводу ищы єст правдом, бо фактычнi: «Тото спостережыня односило ся тiж до нашых – назвийме – iнакше думаючых, якых, тiж горстка пришла ачый (не знам чом вставилисте ту тото: ачый – ред.) на наше свято». А ле великом юж Вашом хыбом єст вывiд, же на наше лемкiвскє Сьвато пришол єм: почути, якы полiтичны чуда-дива взглядом 100. рiчницi Республикы будете ту пропагувати. Куме, пришол єм для нашой лемкiвской поезиi и присутнiстйом оддати шану моiм дiдам, котры в 1918 роцi во Фльоринцi были. Был єм там лем за то и аж за то. А дже не пришывайте мi вашой латкы и не мiряйте ня свойом мiрком.

———————————————————————————————————————

  1. Хоц пропонуваны комiсийом пункты засiданя тыкали лем проблемiв лемкiвской етнiчной меншыны в Польщы, дальшы органiзациi, менуючы ся лемкiвскыма, не были присутны на засiданю. Гладайте статю Демка Трохановского «Засiданя соймовой комiсиi в лемкiвскых справах» в: «Бесiда» з 8 грудня 2018 рока.
  2. і 3. Тамже.

Поділитися:

Категорії : Лемки

Схожі статті

Залишити відповідь

Ваша e-mail адреса не оприлюднюватиметься. Обов’язкові поля позначені *

*
*