Олько Маслей ■ ЛЕМКІВСКА СТОРІНКА ■ 2010-07-15
{mosimage}
В Олаві 26 червня (в суботу), при гарні хвилі, зобралися олавчане на чергові ватрі. Недалеко Вроцлава на лучци “Старой цеголні”, де переселили родину Лабівских. Ту наша пісня припоминала, як цне ся лемкам за горами.
Організатором ватри бив олавский кружок Об’єднання лемків, а властиві квартет родин: Чупиків, Лабівских, Вислоцких і Співаків.
Виступав “Бурян” з Горлиц, якого подібно до цна виполол своім співом “Лемко Тавер” зо Стшелец-Краєньских. На увагу заслуговує конкурс “You cаn dance”, што мож по лемківски свобідно повісти “Но ле гуляй”, який дуже успішно вела молода Чупиканя.
Охочих било гідні і веселости тіж, ведуча разом з журі, як на взір телевізийного шов TVN, спільно бавили добри глядачів, але думам, же і себе тіж. Діти мали занятя г пластичним конкурсі. Вшитким вручив нагороди Юрко Лабівскі. “Маґурски дики” розгребали вшитких, што станули ім на дорозі в турнірі сітки, та по одобраню нагороди, яком била скринка пива, сіли сой спокійні під зонтиками і узуповняли випочени води. Вечером до гулянки грав “Бурян” з Горлиц, а небо розсвічували штучни огні.
Штефан Чупик – голова гуртка ОЛ в Олаві, весело смотрив на сцену і збихал спокійні на душі, бо ватра ся вдала. Мушу признати, олавчане видумали штоси цікаве, до квитка вступу долучено купони, за яки безплатно давали і каву, і чай, но і істи! Тому вшитки охочо купували іх. Одра спокійно і по тихи плинува на Вроцлав, “Бурян” грав до забави, а комари, повідают ватряне, не кусали. Добри в Олаві повідают і юж о наступні ватри думают.
“Наше слово” №29, 18 липня 2010 року {moscomment}
