Што гнеска вчат про нас, лемків, в школах

ЛЕМКІВСЬКА СТОРІНКА ■ №46, 2018-11-18

Два роки тому в Польщи прошла велька реформа шкільництва. Зліквідувано гімназії, покликано 8-клясови початкови школи та ціж 4-літні ліцеї. Реформа ціж впровадила нову підставу програмову, в якій, між іншим, звекшено кількіст годин з історії. Видавництва почалі видавати нові підручники, в котрих іх автори хтілі представити нову реформу.

Фото сторінки з підручника історії. Знімок Олександра Маслея

Ту, як вчитель в школі, я виберав видавництво і його підручник, на якому має працювати дзецко в 7 клясі.

Все медже вчителями історії видавництво ВСіП (Wydawnictwа Szkolne i Pedagogiczne) мало добру позицію. Хоц деякі вважают, што є за дуже там інформації для гнесьнього учня, для якого книжка – то юж не за дуже криниця інформації напроти багацтва Інтернету. Але я особисто любю, а може любив то видавництво, бо гнеска кус мам інший погляд. А то змінився там преказ про нас, лемків.

А як ви думате, читаче «Нашого слова», – то дайте знати. І ту апелюю до лемків, і не лем, бо ми вшитки єдно. А деяки, на жаль, хцут, штоб ми не билі єдно, думаючи, што лемків вигнано – виселено в 1947 році «przez pomyłkę». А то не била помилка, лем свідоме діяня, штоб Лемковина стала польском земльом, а не земльом, де жила і била вікова традиція Київской Руси — України. На жаль, деяким лемкам і організаціям залежит, штоб на нас спозерали інши, што ми лем кози, уці, корови паслі і так жилі віками. Шануючи тоти уці, кози, корови, ми не можеме забивати кільо люди з Лемковини вклало свій слід для цілого нашого україньского народу. Лем нашого.

Деяки священики греко-католицки вважают, што треба пошанувати вшитки погляди лемків, і то добрі, лем чи мают вони свідоміст, што в теорії «волоской колонізації» правдивий лемко є лем православни. Думам, што хцут добрі, але…

Вертаючи до того підручника для 7 кляси з історії видавництва ВСіП. Його авторами є Ігор Конкольовскі, Кшиштоф Ковалевскі, Аніта Плюміньска- Мєльох. На страні 228 є мапа — карта, котра вказує населеня РП на підставі спису з 1921 року. І там в підручнику є лемки як «Łemkowie to góralska ludność zamieszkująca tereny Karpat, wyznająca prawosławie». Не думам, што мої дідове і прадідове хтілі биті так називани. І не ходит лем про віроісповіданя, бо все православне для них било ціж наше, хоц кус за барз під впливом безпеки комуністичной по ІІ світовой війні.

Так што самі оцінте тоту карту-мапу, і де веде нас лемківскій сепаратизм. Шануйме ся і робме вшитко, штоб ми не пропалі. Я вірю, што можеме і зробиме те на славу памяті минулих поколінь і славу, де живе надія для наступних поколінь.

Поділитися:

Категорії : Лемки

Схожі статті

Залишити відповідь

Ваша e-mail адреса не оприлюднюватиметься. Обов’язкові поля позначені *

*
*