ПОСВЯЧИНЯ памяткових хрестів во Фльоринці

Богдан СалейЛЕМКІВСКА СТОРІНКА2009-08-16

{mosimage}

На двох цментерях во Фльоринці одбило ся 11 липця посвячиня двох памяткових хрестів, уфундуваних колишніма мешканцями села.
Хрести посвятив народжений во Фльоринці Перемиско-Новосанчівскій архиєпископ Православной церкви владика Адам, разом з владиком Паісійом, православним єпископом Горлицким і численно прибилима священниками зо Заходу і з Гір. Слово до вірних владики Адама виповнила рефлексія о долі корінного народу і церкви Лемківщини, їх одроджиню і тирваню.

Єден з хрестів поставлено і посвячено на новім цментери, при церкви, померших хоронено ту од 1935 р. Част того цментеря до гнеска заховала лемківскій характер, є ту дост дуже нових, добрі утриманих памятників.
Скорше подібний хрест посвячено на старім цментери, положенім на березі потока Мостиша, близко місця, де лучит ся він з ріком Білом. Цментір тот бив в 2001 році обєктом реґіонального скандалю, коли по наступній з черги повени потік виполокав цментерни кости і черепи, а самоврядна влада не віділа потреби упорядкуваня ситуації.
Треба било дост довгих і радикальних заходів голови Обєднаня лемків Стефана Гладика, жеби в структурах адміністрацийних Грибова, Нового Санча і Кракова нашли ся добра воля і гроши на уміцніня берега, викупліня цментеря з приватних рук і переданя на власніст православной парафії в Ганчовій.
Настоятель парафії і о. прот. Володислав Канюк єст членом єдиной лемківской родини, котра по виселіню лишила ся во Фльоринці. Отец Канюк, котрий повнив обовязки господаря, дякуючи прибилим за уфундуваня гранітових хрестів, наголосив на окремім організацийним внеску в тото діло Івана Дзядика, подякував тіж за прихильніст присутним на посвячиню грибівскому старості і шолтисови Фльоринки.
На урочистіст приіхало коло 200 осіб, головні колишніх мешканців села зо Заходу, з околиц Любіна, Лігниці, Зеленой Гори. Іх приїзд бив получений з паломничеством на православни торжества Св. Петра і Павла на Горі Явір. Прибили тіж фльоринчане з Горлиц, Криниці і Ганчови. Ініціатива колишніх мешканців Фльоринки, хоц не перша і не єдина того роду, може становити приклад для мешканців інших давних лемківских сіл, як дбати о памят о предках і рідній земли. Два гранітови хрести сут той памяти фізичним знаком.

“Наше слово” №33, 16 серпня 2009 року {moscomment}

Поділитися:

Категорії : Лемки

Залишити відповідь

Ваша e-mail адреса не оприлюднюватиметься. Обов’язкові поля позначені *

*
*