Петро Повазник ■ ЛЕМКІВСКА СТОРІНКА ■ 2009-08-16
{mosimage}
Церква в Пантній Преподобної Матері Параскевії зостала вимурувана в 1916 р. В міжвоєнним окресі Пантна належала до парафії Маластів, горлицкого деканату, перемиской єпархії, а од 1934 р. до Апостольской Адміністрації Лемківщини. В Пантній 1936 р. било 740 греко -католиків. Остатнім парохом до депортацийной акції “Вісла” бив о. Павло Шуфлят. Греко-католикам по повороті з вигнаня і довгих старанях, позволено в 1968 р. на одправи в велики свята, але каждого разу о. Теодор Майкович мусів просити римо-католицкого пробоща о доступ до церкви.
27 жовтня 1999 р. церков повернено греко -католикам. Розпочато капітальний ремонт. Церковни бані покрито мідяном бляхом, одновлено іконостас і цілий інтерієр церкви.
В Пантній 20 червня греко -католики святкували 10-літя приверніня їм церкви. Урочистости очолив Перемиско-Варшавский митрополит Іван Мартиняк в співслужиню отців криницко-краківского деканату. Святкувано кругли річниці митрополита: 70-літя народжиня, 45-літя священства, 20-літя єпископства.
Вірни приїхали зо вшитких місцевости деканату: Білянки, Висови, Гладишова, Горлиц, Криниці, Кракова, Квятоня, Лоси, Маластова, Нового Санча, Новиці, Пантной, Прислопа, Розділя, Ропиці, Рихвалду, Реґетова, Смереківця, Снітниці, Устя та інших місцевости.
Митрополит висловив велику вдячніст маластовянам і панкнянам за вистояня і пережитя насильной заборони діяня греко -католицкой церкви, коли інші наші парафії піддалися натиску тих, що конче хотіли знищити і не допустити до одродженя нашой церкви. Але завдяки систематичним стараням вірних, вдалося на Лемківщині повернути греко- католикам вшитки церкви в селах, до котрих вернули вірни з вигнаня. В проповіди владика розказав про початкови богослужиня по повороті з депортації на Лемківщину, яки з велькима клопотами одправляли, вже покійни, отці: Василь Гриник, Теодор Майкович, Степан Дзюбина. Зенон Дрозд, Михайло Борис та інши, до яких зачислив й самого себе. Отця В. Гриника тодішні “опікуни” арештували і категорично заборонили приїжджати на Лемківщину.
По урочистих Богослужбах вшитки з церкви разом зо священнослужителями поїхали до Ропиці, де в місцевим Домі культури в артистичній програмі виступила частина ансамблю “Веретено” і сама Юлія Дошна. Ціліст святкувань приготував парох Пантной о. Григорій Назар з вірнима.
“Наше слово” №33, 16 серпня 2009 року {moscomment}
