Марко Постiв-Яруга ■ ЛЕМКІВСКА СТОРІНКА ■ №2, 2020-01-12

Не мам жадных сумнiвiв, колядуйме, плекайме старинны звычаi нашых предкiв. Цiлом душом єм за колядуваньом, але то не значыт, же не виджу темнiжшой страны нашого гнешнього колядуваня. Традиция єст добра, але, думам, же мусиме до серця взяти си слова великого апостола св. Павла, найдете iх в листi до Галатiв: І я перевищував в юдействi багатьoх своiх ровесникiв роду мого, бувши запеклим прихильником моiх отцiвських передань. (Гал. 1, 14)

Традиция єст добра, але мусит жыти, не може быти мертва, а вшытко, што жыє, змiнят ся. Не старiє ся, кус iнакше лем выглядат, але ниґда не може стати ся хребтом нашого жытя, його цiльом ци горизонтом. По мойому традиция – то штоси таке в родi окулярiв, през котры фурт смотриме на цiли горизонт нашого жытя, адже на тото, котре минуло, и на тото, котре што лем надiйде. Очы ся псуют и нич в тiм чудного, же шкла в окулярах мiняме, адже так само треба нам робити и з традицийом.

Знате, барз тiшыт ня тото, же коляда жыє. Жыє, бо молоде поколiня переняло го и несе в будучнiст. Колядуваня жыє и добрi ся має, бо в неєдным нашым селi ходят не єдны, а двоi и троi колядникы. Нераз єст и ищы бiльши урожай на колядникiв, но и барз добрi! Коляда жыє, бо молодiж што рока приходит з iншым вертепом. То нич, же не вшыткы новы тексты ся мi подабают, не мусят. Прецiн ищы ся такi не гродил, котри вшыткым бы догодил. Добрi, же хочут ходити и вчат ся новых текстiв. Они в тiм своiм ходжыню по колядi, так як колиси мы, находят радiст в даваню радости iншым.

Старинны колядникы ходили, жебы Добру Новину о Рождествi Месиi нести од хыжы до хыжы и юж при Рiздвi Господнiм, адже на порозi Нового Рока сусiдам своiм желати всякого Божого блага на цiли надходячи рiк. Прецiн юж в Велию, як ґазда вносит сiно ци зерно до хыжы, то три разы повтарят: Подай Бiг! На Щесьця! На Здоровля! На тот Новий Рiк!

Гнешнi колядникы тiж так роблят, Добру Новину о Рождествi Христовiм несут од хыжы до хыжы и юж при Рiздвi Господнiм на порозi Нового Рока желают нам всякого Божого блага на Нови Рiк. Но и барз добрi, бо тот, хто другому чловекови добрi бажат, сiє добро, за то пак сам тiж добро буде зберал. Розсiяне добро нигда не пропаде, фурт вертат до чловека, котри го засiял для другых люди.

Бою ся лем того, жебы гнешнi колядникы не ходили головнi лем для грошы, бо наше колишнє колядуваня ниґда не было наставлене на зарабляня, навет тото передхристияньске таке хыбаль не было. Мы ходилисме головнi з потребы серця, навет давна сьнiжна и морозна лемкiвска зима нас не затримала дома. Раз пiшлисме аджы до сусiднього села, былизме там першыма колядниками од того нещасного выселiня. Не можна описати радости, яку зме там в тых нашых родинах нашли. Не замерзлисме и дякувати Богу дорогу до рiдного села в замети тiж сме нашли. Правда, треба было разом ити и фурт пильнувати ся, жебы дакого слабшого колядника не стратити, а як дахто застрял в сьнiзi, то iншы вытiгали го на выдоптану стежку. Мусите знати, же в нас товды в зимi жадны авта не iздили, пекаесу в имi тiж не было, адже дорогу вказували лем придорожны дерева, а фраси не всяди росли.

Тiшыт ня тото, же того рока аж троi колядничы групы перешли през моє село, но и жадных грошы не зберали. Правдом єст, же єдном таком групом была наша найближша родина. Слава Богу, же ім ся хотiло выйти з-за стола, пiти в замiт, но и в заспах глядати стежкы до нашых хыж, тых в котрых жыют ищы своi люде. Шапку треба зняти, не лем за то, же хотiло ся ім пiти, они прецiн до того колядуваня мусiли ся настроiти; зобрати ся, скласти сценарий, но и свойой ролi навчыти ся. З вертепом и з колядом повела iх потреба серця и душы, колядом розвеселити хотiли себе и другых. Радiст од Бога походит, а сумну бiду сами си на голову стiгаме, коли од Бога ся одвертаме.

Знате, тямит ся мi єдна хыжа, молодiж, з яком колядувал єм, вышла з нєй барз незадоволена, бо достали лем солодощы. Дома была лем ґаздыня з чередком дiты, было єй нияко, бо жадных грошы не мала. По дорозi до наступной хыжы през хвилю треба было iм толкувати, же з колядом прецiн не ходиме для грошы, же тота жена правдоподiбнi дала iм бiльше ниж iншы, же быти може зiли посьлiднi кавальцi солодкого и єй дiточкы будут мусiли обыйти ся смаком. Замовкли, не треба iм было наводити на памят iсториi о двох вдовиных лептах.

О традицию мусиме дбати вшыткы, адже тоты, котры ходят з колядом од хыжы до хыжы, и тоты, котры колядникiв в своi хыжы принимают. Знам, палюнка сама в собi не єст зла. В моi хыжы єст навет єдном з велийных страв, зараз по просфорi и чеснку. Погарик иде товды в коло стола як вказiвка дзиґаря и особа, котра го тримат, желат особi обiк сiдячi и вшыткым разом вшыткого, што лем найлiпше. На єднiм ся кiнчыт, бо найважнiжшы сут слова, а не алькоґол, так як в Тайнi вечерi. Думам, же як в нашi хыжы того рока загостят дакы дозрiлы колядникы, то навет тым єдным сымволiчным погариком не конечнi треба iх частувати, велию iме єдну, но а они сут гостьом традицийной и гостинной неєдной нашой хыжы.

Поділитися: