Марко Постiв-Яруга ■ ЛЕМКІВСЬКА СТОРІНКА ■ №51, 2018-12-23

Голосно ще думам і думам о горi Явiр, о Сьвятi Горi Явiр. Для ня єст вона сьвята, хыбаль не лем для ня єст вынятковом лемкiвском гором. Пошану для Явору выссал єм з материнскым молоком. Гродил єм ся и вырiс на Долишнiм Шлеску, але баба Параска юж в 57’ роцi вернули до рiдного села и за то на Лемковину iздилисме барз часто. В Гладышовi былисме каждого рока, но и на Петра и Павля обовязково на Яворi. Товды ищы не было авт, автобусом iхало ся до Усьця, ту треба было своє одчекати и пересiсти ся на «пекаес» до Высовы. До каплицi ишло ся на пiше, наша проща почынала ся з высiвского пристанку, а не так як гнеска з паркiнгу в лiсi. Товды то была цiлодньова выправа, домiв вертало ся в тот сам спосiб.

Нашы родиче и дiдове перед 47’ роком на горi Явiр молили ся два разы в роцi, на майового Миколая (22 мая) и в осени на Покровы (14 жовтня), ишли без Регєтiв, Козє Ребро и Ганчову. Некотры жены на Явiр приходили юж ден скорше, ночували пiд голым небом, не спали, лем молили ся и плели чатиновы вiнцi. Робыли так як давнiжше, коли ходили до Луцины (Lutinа). Там Русине роблят так до гнеска, на лутiнску сьвяту гору идут ден перед кєрмешом, цiлу нiч молитвом дякуют Богу за Його благу помiч и забiгают о новы блага.

Гнеска юж не приiжджам до рiдного села, вернул єм до нього. Коли во Высовi осiли монахы, на Явiр мож было ходити што тыжня. Товды часто ишли сме там цiлом родином. Што середу отец Мойсей, на жаль юж упокоiвся, або отец Пафнутий, або оба разом правили акафiст до Явiрской Матери Божой, яко подяку за то, же перед вiйном на Явiрскi горi Богородиця обявила ся Фiрийi и нашым предкам. Правду повiсти – то приходилисме и фурт приходити будеме головнi з новыма проханями. Штож, такє жытя, перепон и скорбот в нiм ниґда не бракне. Богу дякувати, фурт маме ищы за што Богу дякувати.

Остатнiма часами, коли ходит о явiрску каплицю, «дуже» ся дiяло. Стає ся тото, што давно тому Фiрийi заповiла Богородиця? (На вiрах будут ся сварити, але молити ся не буде кому). Ци так юж не є? Прецiн явiрска каплиця нашла ся в судi, а суд вернул єй Греко-католицкi церкви. Православна церков отримала правобережну част гори, тоту без каплицi, тепер границьом єст пут. Подiлена гора Явiр, на жаль втихла, прохальной молитвы не чути юж ту так часто як давнiйше. Православна церква в судi програти програла, але молити ся до Богородицi нихто прецiн заборонити єй не годен.

Часом, як приде середа, бракує мi явiрского акафiсту, пишу в середу. Єм греко-католиком, але ходил єм на акафiсты служены православныма монахами. Богородиця не єст ани греко-католицка, ани православна, то Матiр Єдинородного Сына Божого. На Явiр ходив єм и буду ходил лем для Нєй и для Єй Сына. То до Нього каже ся нам молити Богородиця, Фiрийi на крестi наказала выписати змiстовно-глыбоку молитву схiдных монахiв: «Ісусе Христе, Сыне Божый, помилуй нас грiшных». То такє наше, схiднє – одповiдник латиньского «różańca».

Вiрю, даст Бог, же зас вернут люде на Явiр, не жебы ся сварити, але молити. єдны и другы най там ходят. Як вiрити карточцi завiшенi на капличных дверьох, отворена єст для вшыткых. Прецiн колиси в бiлянчаньскi церкви разом молили ся не лем греко-католикы и православны, але и римо-католикы навет, правда, кажды окремо о своiм часi. На Яворi так не можут?

Рахую на простых люди, в них єст велика сила. Істория вчыт (Fatima, Lurds, Medżugorie), же Богородиця бесiдує з дiтми и з нашом Фiрийом, а не з єпископами. Колиси єдна гладышовянка, покiйна Марiя, написала лист до владикы Адама (гнеска тiж юж покiйного), описала своi oкoлоявiрскы задумы. Заявила, же в великоднiм часi на Сьвятi Горi Явiр добрi было бы одправляти Службу Божу, бо на Яворi бракує такой сьвяточной одправы. Хтiла, жебы и там залунало прекрасне наше «Христос Воскрес». Уважала, же в великоднiм часi Богородицi треба подякувати за блага, якы фурт отримуєме од Ісуса Христа – Єй Сына, а Бога нашого. Архiєпископ Адам скоро одписали и красьнi подякували за такы думкы и переказали, же Служба Божа буде одправляна в Недiлю Самарянкы, згiдно з єй пропозицийом. Так єст до гнеска. Тоту недiлю панi Марiя выбрали задля змiсту бесiды, яку при криницi Якова Ісус вюл зо Самарянком. Студню на горi Явiр казала выкопати сама Богородиця, находит ся по тi самi странi дорогы што и каплиця. Все єй воду заберам домiв, то нич, же часом єст сколомучена. Ниґда ся не встарiла, а часто так дiє ся зо звыклом водом лишеном в запертi фляшцi. В тi з Явора осад опаде на дно, а она єст смачна и што важнiжше цiлюща. Недавно православны выкопали свою креницю, певнi узнали, же не годит ся води Богородицьом вказаной и тiлко раз посьвячаной ужывати яко будiвельного матерялу. Правда, воду до будовы каплицi брано зо старой студнi, але товды вода в нєй не была ищы сьвячена.

Штож, думам, же гнеска треба нам бiльше такых жен як гладышовянка Марiя, здали бы ся в каждi парохйi єдной и другой нашой Церкви. Владикам и нам пiдповiдали бы як маме побожно и мирнi жыти, но и товды може акафiст на Яворi одправляни был бы не лем раз в тижни. Не рахую на натовп люди, и жменя єст Богу мила, жмiнка тiж.

В тамты акафiстны середы часом тiж приходило мало люди. Тоты, котры приходили, были ту не за то, же хтоси iм казал и не за то, же выпадало ту быти. Приходили, бо хотiли ту быти. Пришли ся помолити, подякувати за стары и просити о новы блага. Часом было и так, же было нас двоє або лем єгомосьць. Традицийнi о сiмнадцетi почынала ся молитва, а коли кiнчылисме, было нас юж дуже бiльше. З высiвскых санаториiв приходили курацюше-Полякы. Некотры пришли и заразiцька выходили, але были такы, котры остали до кiнця. Видно было, же щыро ся молят, же ту добрi ся чуют. Чудували ся, же православны почытают Богородицю, тото, же мы не шануєме Богородицi до голов втолкли iм римо- католицкы єгомосьцi (Ходило iм о Niepokalanе Poczęciе NMP, в 1854 р. впроваджене папом римскым. мы по старому маме товды Зачатя св. Анны).

Кєрмешiв не люблю, але камеральной акафiстной молитвы мi бракує. Знате, тiшыт ня тото, же и в нас, так як в Лiтмановi, на Явiр люде приходят не лем в ден сьвяточной одправы, але и так на штоден, приватнi. Приходят, жебы быти на Яворi, на самотi помолити ся до Богородицi, посiдити и побесiдувати лем з Ньом и Єдынородным. Нераз зышли сме ся там з онуками Фiрийi, тiж так як мы, приходят ту помолити ся, вшанувати Богородицю и Фiрию. В мiшечку вносиме квiтя и сьвiчкы, а зносиме сьмiтя. Не годит ся, жебы тото мiсце осьвячене появом Богородицi было осквернене тым, што залишат ту припадковы некультуральны люде. При каплици проходит туристични шлях.

В Лiтмановi на горi Звiр в комiрочцi заперанi лем на скiбку, колиси была мiтла, коса, граблi и вилы. Кажди обознани з тыма знарядями мiг взяти iх в рукы, жебы Сьвяте Мiсце и по людскы покращало. Шкода, же в нас не є такого мiсця з простыма, але якже помiчныма знарядями.

Поділитися: