Марко Постiв-ЯругаЛЕМКІВСКА СТОРІНКА№29, 2018-07-22

Никда не забуду, як мi пах хлiб, котри мама вынимали з пеца. З сестром не моглисме ся дочекати, коли ся хпече, залежало то од того як в пецу было напалено, ци перед гложыньом хлiба пец был добрi нагрiти.

Хлiб мама пекли раз в тыждни, в суботу або в пятницю. То залежало од того коли стари остал зiджени. Зачынало ся од сiяня мукы, была зо свого зерна змеленого в млинi. Сiяли єй до корыта, а пак додавали до нєй воду, дрiжджы и квас, но и юж мож было зачыняти кiсто на хлiб. Квас – то кус кiста лишеного з попереднього печыня хлiба. Як єм кус пiдрiс, зачал єм помагати мамi и зачын робил єм юж я, бо то тяжка робота. Тато до мiшыня кiста зробили мi невелику деревяну опатку. Добрi зароблене кiсто легко припорошыли муком и крайом долони зробили на нiм крестик и одкладали в тепле мiсце, в нас найчастiжше клали го на пецу. Пак по кiлькох годинах, як кiсто кус пiдросло, зас треба было го замiсити.

Часто при хлiбi в такi малi бляшцi мама для нас дiти пекли солодку бувку з крушонком, была на недiлю.

Товды о хлiбi печеным в пецу знали вшыткы сусiде и не лем они, його запах розходил ся по цiлi околицi. Дыму не было, але в повiтрю царювал пах печеного хлiба. Знате, раз за тим пахом до бабиной хыжы гвошли партизане, за хлiбами пришли. Не были ищы хпечены, заждали и взяли вшыткы. Коли баба почали боженкати, што рано дiтом дадут, же нового прецiн до рана не впечут, вояк вытяг єден хлiб з мiха и лишыл на столi.

Коли мама хлiбы до пеца гложыли, мы дiты лем пляшалисме и фурт зьвiдувалисме ся ци юж. Знали, же нi, але раз ци и зо два разы заздрiли до пеца, жебы нас заспокоiти. Як зас си клякли при дверцьох до хлiбового пеца, зналисме, же хлiбы сут юж хпечены. Виджу як вытiгают перши хлiб, вынимают го з бляшкы и палцiм пукают по його сподi, бесiдуючи: Буде, бо юж ся мi добрi озыват.

Нераз хлiб долше тримали в пецу, але не за довго, бо бы высох. Про нас так робили, барз добрi знали, же лем чекаме на тото, жебы си одламати и зiсти тото «кiсто», котре втiкало з бляшкы, але не встигло, бо ся хпекло. То была сама скiрка, мама позваляли нам єй брати, але просили, жебысме од разу єй не iли.

З печыньом хлiба вяже ся ищы дуже iншых старинных звычаiв. О єдным з ных повинен єм скорше юж речы, коли радил єм о выношыню угликiв. Не можна iх было мiшати з попелом спiд шпаргета. Треба было iх складати з попелом хлiбового пеца и высипати не быле де, але на поли, де буде росло зерно. Вiрили, же як дака ґаздыня так бы не робила, товды ґаздiвка стратит Божу благодать. Бесiдували, же така ґаздыня, коли в молитвi просит: Хлiба нашого насущного дажд нам днесь, зневажат Бога, бо не шанує Його дару, допче по попелi з хлiбного пеца.

Коли перши раз хлiб брала до кроiня, тiж го кстила, але не руком, а ножом. По одкройiню скыбкы хлiб пак так клала на столi, жебы закроєным не смотрiл до двери ани выгляду, жебы ґаздiвка не марнiла. Найлiпше было, коли закроєным обернени был до пеца.

Коли скыбка дакому хпала на землю, то казали єй скоро пiднести и поцiлувати. На стiл никому не позваляли сiдати, бо там ся хлiб кладе, а не выбачте «шановну».

Хлiб, то богатство, хто го шанувал, ничого му не бракувало, зато нашы предкы зберали колося потрачене по стерниску, ци найменшы кыршынкы хлiба зо землi.

Добра ґаздыня знала, же коли мiсит кiсто, не вiльно єй того робити з отвореном ґамбом, бо товды єй хлiб в пецу ся одує – од хлiба оддiлит ся скiрка. Мы гнеска знаме чом так ся дiє, але нашы предкы в тото сьвятi вiрили.

При печыню хлiба треба было уважати на вшытко, што ся того дня робит ци бесiдує, жебы, борони Боже, хлiбови дачым не зашкодити, жебы кiсто добрi росло, жебы хлiб был добi хпечени, но и жебы был смачни.

Коли кiсто на бляшках юж выросло и треба го было давати до пеца, ґаздыня заперала двери и выгляды, жебы хлiб єй в пецу не опал.

Того дня не вiльно было замiтати хыжы, хто пряче товды, вымiтат доброту и ворожыт си на бiду, нашы дiдове бесiдували, же: Як єст хлiб и вода, то не є голода. Хыжа мала быти ометена скорше, бо там, де хлiб мал быти печени, мало быти чысто.

Баба бесiдували, же тота ґаздыня, котра не шанує домашнiх зьвiрят, головнi ходило ім о пса и кота, нигда не хпече доброго и смачного хлiба. Лем в бабы Параски вiдiл єм, же коли выняли перши хлiб, кавальчык од нiого гломили и шмарили на оген пiд шпаргетом. Повiдали, же то для душ нашых предкiв. Оны, так як моi мама, хлiб перед всаджыньом до пеца смарували бiлком, по хлiбi розсмарували го гусячым перком. Коли го з пеца вытягли смарували го юж лем водом, товды мастили го руком. Том водом што остала, кропили угла хыжы, в тот спосiв хтiли оборонити хыжу перед огньом.

Знате, смаку маминого хлiба нигда не забуду, все мi буде пах. Найсмачнiжша была перша скыбка. Не думайте си, не за то, же был єм голоден, але за то, же перша. То прецiн окраєц, а ищы з сестром треба было ся ним подiлити. Найбарже смакувал мi ищы тепли, на котрым масло, дома сьвiжо того дня зроблене, топило ся. О медi нич юж бесiдувати не буду.

Як си лем спомну, то юж великi жаль ня огартат, же нашы дiти того юж не знают. Склепови хлiб, якi бы вiн не был, навет тот з пекарнi, навет и тот ищы тепли, такого смаку юж не ма. Не ма го и тот хпечени дома, бо в електрычнiм пецу, а то юж чысто iнша байка. ■

Поділитися:

Категорії : Лемки

Схожі статті

Залишити відповідь

Ваша e-mail адреса не оприлюднюватиметься. Обов’язкові поля позначені *

*
*