«Ватра» на чужині в Михалові

Адам ВєвюркаЛЕМКІВСКА СТОРІНКА№35, 2014-08-31

Одишла в минуле 34 «Ватра» на чужині в Михалові, але лішила певні емоції і вражиня. Напевно в векшости позитивні, бо кожна «ватра» в Польщі і на світі свідчит, што там, де горит, жиют лемки, які хцут памятати о традиції і вірі предків. «Ватра» в Михалові заперла «ватри» в Польщі. Загас оген в Ждині, Лугах, Битові та інших місцях в північній Польщі і на конец в Михалові.

Подібні як в Ждині, 34 «Ватра» на чужині в Михалові, пройшла при барз гардій, сонячній погоді. Так, якби сонце вказало, што так само світит і гріє для Об’єднання Лемків і Стоваришіня Лемків. В тим році сонце обєднало Ждиню і Михалів.
До Михалова, як і до Ждині, приїжджают лемки з різних поколінь. І ту є проблема, але і сила, штоб вшитких накормити так лемківством, штоби през цілий рік ним жили і заз на «ватру» приїхали. Старши поколіня хцут барже історичной «ватри», молодши лем забави, а наймолодши винести з «ватри» якису нагороду чи забавку. І для кожного поколіня організаторе мусят знайти щось лемківского.
Однак вшитких ватрян кличе на «ватри» потреба спітканя, штоб зийти ся разом, де є рідна мова і пісня. Лем внеска од люди в праці, переважні молодих, вимагат ся т.зв. диспозицийности і не вшитки можут дістати вільне, штоб поїхати на «ватру» в гори, для того «ватра» в Михалові є «вигідніша». А і старше поколіня штораз менше має сил, штоб 500–700 км іхати в рідни страни. Для того «ватра» на чужині в Михалові є потрібна і повинна єднати лемків.

На «Ватрі»
На «Ватрі». Фото Ярослава Мазура

Почалася 34 «Ватра» в пятницю 1 серпня о год. 19 зложиням квітів під памятником при співі хору «Зоря» з Горлиць. По розпаліню ватри в пятницю на сцені виступили знани нам ансамблі лем з Польщи: «Ластівочка», «Кичера», «7кропка», «Гудаци», «Надія», а на забаві до танця грала «Троянда». По виступі «7кропки» вручено нагороду Никифора, яку капітула СЛ призначила свойому голові-презесові СЛ Андрійові Копчи.

В суботу виступили: «Яблонечка» – фолкльорний ансамбль з села Печовска Нова Весь на Словациі; «Сонечка» – дитячий ансамбль з греко-католицкой парохіi в Заменицях; «Ластівчата» – дитяча група, што діє при ансамблю «Ластівочка», до котрой належат діти з Пшемкова і околиць; «Кичерка» – дитяча група Лемківского ансамблю пісні і танця «Кичера»; «Терочка» – дитячий ансамбль, який діє при Стоваришиню «Руска Бурса» в Ґорлицях, заснований 2010 р. през Андрия і Галіну Малецких; «Барвінок» – ансамбль пісні і танця, істніє від 1952 рока в селі Камюнка на Словациі; «Літаючий диван» – польский ансамбль, який співає польску поезію, котра ціж торкає Лемківщини; «Діканда» – група презентує любов до традицийной музики, має свій специфічний стиль, повязаниий з африканьском музиком; «Рокаш» – ансамбль, котрий грає рок з вплетенима елементами закарпатского фольклору, група походит з Мукачева. Напевно то била зірка 34 «Ватри» на чужині в Михалові.
На суботній сцені «ватри» виступали іщи: Анна Барнова, «Смерек», «Серенча», а до танця на конец заграла група зі Словациі «Šarišské Parobci».
«Ватра» в Ждині проходила в атмосфері сумних подій на Украіні і в тим терпіню лемків на Донеччині і Луганщині. На жаль, в Михалові о тим не згадано, як і не достерігатся на сцені, што на «ватрі» є лемки, яки хцут ширше видіти лемківскій світ і не ділити його, хто може биті лемком, а хто ні. Але тот проблем є не лем од внеска на «ватрах» в Михалові. Однак тема Украіни жила межде ватрянами. І люде задумувалися, што далі буде на Донбасі та в цілій Украіні. Чи доля украінского народу, в тим лемків, буде ласкава і чи світ допоможе Украіні.
Барз добрі, што проведено різни конкурси для діти і молоді, де стараются защепляти любов до рідной бесіди і традицій. То є надія, што вшитким нам залежит, штоб далі переказувати наступним поколіням лемківске багацтво наших предків. Хай тота надія ніколи не гасне на наших «ватрах» од Ждини до Михалова, а наш світ буде іщи довго існувати.
За рік заз загорят «ватри» в Польщі і на світі. Заз ся зийдеме і порадуєме, што Бог нам дав дар вродитися лемком. Хай тот дар ніхто з нас не одшмарит. А того ніхто не хоче, в тим наши організації ОЛ і СЛ. Хай сонце Ждині і Михалова вкаже нам мудру, вспільну, лемківску дорогу. ■

Поділитися:

Категорії : Лемки

Залишити відповідь

Ваша e-mail адреса не оприлюднюватиметься. Обов’язкові поля позначені *

*
*