Адам Вєвюрка ■ ЛЕМКІВСКА СТОРІНКА ■ №23, 2017-06-04
У греко-католицкій церкві Переображиня Господнього у Шпротаві 30 квітня, подібні як в інших церквах у тих днях, відзначено сумну річницю, котра юж 70 літ вказує, яка била наша доля по 1947 році. Перед тим роком нас ділено, штоб ми не билі вшитки як єден народ. В 1947 році вигнано нас як єден народ. А по пару роках заз почали нас ділити і так є до гнеска. А ми часто ся тішиме та попераме тоти поділи. Раз я почув голос лемка під церквом в Лігниці, што треба би било іщи раз деяких виселити з гір, штоб зрозуміли, ким є. Я не поперам того аж так, але штосі є кус в тим правди…
На початку била штонедільна літургія, на котрій парох Андрій Бунзило одчитав лист наших владик про Акцію «Вісла». Лист тот, думам, барз добрі вказує правду про виселеня на ґрунті історії як і гнесьне наше житя та церкви в Польщі. По літургії відслужено панахиду при дошці «Памяті Виселених», котру встановлено в 1997 році. На конец як «Вічная Память» люде заспівали «Христос Воскрес» і перешлі до гостинного залу. Там найперше вшитких привитав о. Андрій та поблагословив молитвом страви, м.ін. яйце як символ житя і воскресіня. А далі била артистична програма о Акції «Вісла» діти з пункту навчаня та парохії, яких приготувала пані імосць Ольга – вчителька української мови та голова місцевого гуртка Обєднаня українців у Польщі (ОУП). Барз мило ціж било видіти, што є з нами наши люде з України, яких економічна криза та війна привели ціж до Шпротави в Польщі.
Я на запрошиня парохії та місцевого гуртка Обєднаня лемків (ОЛ) на чолі з паном Павлом Шевчиком представив, як виглядала Акція «Вісла» на цілій нашій території не лем на Лемківщині та вказав запис спогадів панства Гойняків – Марії і покійного юж пана Петра. Запис тот зробив пан Роман Крик, голова Фундації «Живі долі», котрий відвідав юж праві 1000 осіб, списуючи тоти спогади. Виступила ціж пані Ольга Трохановска, яка емоційно зарецитувала вірш о Лемківщині. На конец билі спогади виселених, котри билі на тій гостині. А найбарже поважаним бив пан Еміль Стримецкій – довголітній діяч і церковник, котрого спогади почав власне друкувати квартальник ОЛ «Ватра».
