В Театрі ім. Юліюша Остервы в Ґожові 6 листопада організувано ХІХ Стрічы з лемківском культуром. Організатором заходу є ґожівскє Стоваришыня лемків в особах Івана Ґаборика, Романа Дзюбиньского, Іринея Смальця, Романа Стерженя.

Oрганізаторе забезпечили дост цікаву програму – выступили православний хор “Сотіря” з Ґожова під кєрівництвом Олександра Левчишина, “Лемко товер юньор” зо Сшельців-Краєнскых під кєрівництвом Олега Смолія, “Барви Львова” зо Львова під кєрівництвом Наталії Курило та Фольклорний ансамбль “Хемлон” з Гуменного (Словаччина) під кєрівництвом Мирослава Кереканича. Концерт провадили по нашому і по польскы Анна Ґаборик та Андрий Михаляк.

Як перший выступив хор “Сотіря”, який діє в Ґожові юж од 2005 р. На концерті заспівали “Богородице Діво” авторства Дмитра Бортнянского та народны пісні во власній обробці, м. ін. “Повіяв вітер степовий”, “Ой, чорна я си, чорна”.
Чудовий концерт дали “Барви Львова”. Ансамбль творят абсольвенткы Львівской музичной консерваторії. Тетяна Оленич (спів), Наталія Курило (бандура, спів), Ольга Маріяш (гушлі, спів), Роман Капранов (акордіон) заспівали і заграли народны пісні во власній обробці, м. ін. “Ішов козак потайком”, “Посилала мене мати”, “На каменю ноги мила”, “Ой у вишневому садочку”, “Ой, верше мій, верше”, “Чорноморец”, “Чиє ж то полечко”, “Ой у полі калина”, “Розпрягайте хлопці коні”, “Як я їхав з Дебречина додому”. Аранжації львівскых музиків спиралися в великій мірі на їх схильніст до джазу.
Концерт “Лемко товер юньор” быв, можна повісти, вступом до барз важливой події. По двох співанках ансамблю воєвода любуский Ян Сьвірепо вручив о. Артурови Грабанови, православному парохови з Лугів і Березы, Золоту медаль Заслуги за діяня на річ зберіганя лемківской культуры.
Стрічы закінчив выступ ансамблю “Хемлон” з Гуменного, який запрезентував пісні і танці русинів з Земплина во всхідній Словаччині.