Н.Г. ■ ЛЕМКІВСКА СТОРІНКА ■ №18, 2015-05-03
В суботу 25 квітня пополудни Центр культури ім. Богдана-Ігоря Антонича одвідили виняткови гості. Група дванадцетьох діти и їх опікуни приїхали до нас з України, а докладні з ріжних части того краю, м.ін. з Львівской, Хмельницкой, Київской, Чернігівской, Івано-Франківской области. В Горлицях гостили тижден, а нас одвідили 18 квітня, ден перед виїздом. Приїзд діти, вітцьове котрих боронят свойого краю на війні, організувала Малопольска фундація приязни польско-україньско-словацкой. Візита в нас била єдним з пунктів програми іх побиту.
В рамах спітканя організували-зме нашим малим гостям несподіванку: варштати малюваня традицийних лемківских писанок і барже сучасну форму того мистецтва – великодни писанки, оздабляни пацюрками, басанунками и інчима готовима матеріалами. Варштати провадила Вікторія Гойсак. Вказали-зме дітям тіж наши регіональни строї, кімнату-музей поета Б.-І. Антонича. Било дуже радости и забави, а на закінчиня спільна знимка в лемківских строях.