Адам Вєвюрка ■ ЛЕМКІВСЬКА СТОРІНКА ■ №18, 2018-05-06

Як што року, 20–22 липня заз до Ждині приїдут лемки з цілого світа, симпатики Лемківщини та цілих наших Карпат. Яка буде XXXVI «ждиньска ватра»? Хоц до кінця не знаме вшиткого, але можна повісти, што організаторе юж кус вказалі: головном темом буде – ВЕСІЛЯ. Не лем сам обряд, де молодята ідут до церкви, а потім вшитки ся бавлят. Організаторе «ватри» хцут вказати повний обряд весільний, як то било до вигнаня. А з другой страни, дати доказ, што наступни поколіня хцут вертати до повной, цілой традиції предків. Бо так направду тоту весільну тему далі молоди члени заряду і головной управи ОЛ. Запрашаме вшитких на «ватру». Лемків з каждой страни Польщи, тих багєнних з півночи Польши ціж, бо Ждиня як што року кличе нас вшитких, кому не чужа наша культура. Чи буде погода? – люде ся питают часто. Повім, што організаторе на 100% твердят, што ТАК. Буде сонце або буде ляло. Так што погода якиса буде напевно. А так «ватра» реклямуєся на Facebooк:

«Лемківска ватра» в Ждини юж од 36 років є місцьом для спільной, міжпоколіньовой забави, як тіж нагодом до інспіруючих стріч і дискусій. До нашой «ватри» прилипли юж постійни точки програми, але фурт не здаєме пляцу бою і кожного року намагамеся пропонувати вам дашто нове. Минулорічна «ватра» била для нас спомином Акції «Вісла» в єй 70-ту річницю. Розмір той травми має фурт вплив не лем на лемків, котри досвідчили єй безпосередньо, але тіж на нови поколіня. Попри то з надійом і оптимізмом позераме в майбутнє, зато темом тогорічного Свята лемківской культури буде лемківске весіля!

В лемківскій традиції весіля й обичаї, повіря, обряди і практики, яки ся з ним вяжут, мают принести молодятам любов, здоровля і успіх. Того хочеме жичити не лем собі, але тіж шитким учасникам Свята лемківской культури. «Лемківску ватру» з весільом вяже дуже символічних дій. «Ватра» – то місце, в яким стрічаются, розділени перед роками родини, молоди пізнают нових знаємих, а спільни танці і співи лунают до білого рана, аж сонечко зийде. «Ватра» – то тіж велика родинна стріча, од якой бє любов люди до себе і до того, што своє, рідне. Зато рішили зме вплести елементи весіля в нашу «ватряну» програму.

В програмі XXXVI «Лемківской ватри» в Ждини передвиділи зме медже інчима: кольоровий весільний похід, який отворит тридневне святкуваня, стрічу весільних старостів з панельом, на яким побесідуєме о сучасних лемківских весілях, варштати весільних приспівок і вязаня хусток, науку сващиня, стрічу з весільнима обрядами, виставу шлюбной фотографії, шоу «Лемківске ранде по-темки» і конкурс для лемківских пар.

Не буде бракувало традицийной і модерной музики, як тіж весільной «під ногу» і такой, што мож собі спокійно послухати.

Авторски і тематични стрічи – то медже інчима:

● «Мої дідове – розділ, якого не є» – стріча з Марком Лущином в контексті книжки «Малий злочин»;
● «Сироп з полину. Вигнани в Акції „Вісла”» – стріча з Павлом Смоленьским;
● Дилеми модерной тотожности – тематична стріча;
● Народни способи на гроки в Карпатах;
● Весільни обряди на Лемковині;
● Волохи в історії і культурі інчих націй.

Тоти, котри люблят активний випочинок, на «ватрі» найдут XIV «Лемківску спартакіаду», ціли три дни культурних анімацій для наймолодших «ватрян» на «ватрочці», вистави, теренови гри, прогулянки за зільом.

Love is in the air! Любов є в повітрі!
Любов є на «ватрі» в Ждини!

Не думайте, што то є вшитко. Цілий час родятся свіжи думки, та і все не можна вам повідати. Рихтуйме ся на «ватру», бо юж не довго липец. Нам треба відвідати свої страни і дати свідоцтво, што Лемківщина-Лемковина не чужа своїм дітям. Не забивайме ціж, што при «ватрі» є інши події, яки організуют наши організації і Церкви. Користайме з того, бо то вшитко наше.

А як іщи на «ватрі» звяжеся направду якисе вінчаня, то думам, же молодятам не попустиме та на тим весілі вшитки «ватряне» будеме.

Поділитися: