Олександр Маслей ■ ЛЕМКІВСКА СТОРІНКА ■ №9, 2014-03-02
Коли пані Лідія Курило передала мені свої архівальни збірки, фотографйі та хроніки з минулого віку, я почав думати, чому ще існуємо!
На одні фототографйі підписала: справа – Борис Гнатишак, Дарія Король, Ропецкий, дириґент хору, Надя Копистяньска, Надя Гнатишабова, Дарія Копистянска. Ця фотография з минулого віку – Закопане, 1936 рік. Польский літописец в хроніці записав: «З усіх сторін Карпат від Ользи аж до Черемошу, наплили ріжнородни і ріжноманітни групи реґіональни. Бескиди Сілезйі репрезентували Істебна і Вісла, Більске – Віламовіце, Живеччизну – та околиці Живца від Завої до Горців, з Бескиду Островского наплили Порублане, Щижичани та інші представники Ліманівского і Мисленіцкого, Скельне Підгаля репрезентували групи оравска, спіска, пєніньска і закопяньска. Новосанчівщина, де найближша околиця Нового Санча – то Подегродзє і Лонцко. Окрему категорію преславлял лемкіский хор з Криници. Лемківщина зявила ся в трьох групах: ясільскій, коросняньскій і ліскій. Бойківщина в групі стрийскій і туряньскій, Гуцульщина – в надвірняньскій, коломийскій, косовскій.»
Тот хор мав також велики успіхи на концертах у Львові та інших фестивалях. Діставав нагороди, хоц би за занята третього місьця на «Святі гір» в Закопаним. «Свято гір» зникнуло в Польщи по ІІ Світові війні, та і зникнуло з Польщи троха гуралів. Фестиваль починає несміло відроджувати ся по 1998 році. Початково організувано конференцйі, а потім в Новому Санчі організує ся «Свято діти гір». Гнеска то незалежна інституция з великим бюджетом, кількадесят раз більшим од «Лемківской ватри».
В тим році до Закопаного повернуло «Свято гір». Лемки были презентувани дост міцно, але по рівно, танец і сьпів представляв репрезентаційний ансамбль Стоваришиня лемків «Ластівочка» з Пшемкова и заняв третє місце в свої категорйі.
На фестивалю, по правді барже особисто, культуру лемківску презентувала Марія Келечава з Вроцлавя з Об’єднання лемків, яка зо своіма батикуванима яйцями є запрашана і нагороджана на найвекших світових фестивалах. ■
