Йоанна Лабілска ■ ЛЕМКІВСКА СТОРІНКА ■ №1, 2017-01-01
Як відомо, Сьвяти Миколай в різдвяним часі ма руки полни роботи. Сотки тисячи кільометрів до поконаня, тони подарків до достарчиня для мільйонів дітий, котри з нетерпливостьом чекают на вимарену річ.
Не інакше било і з нашима дітми в Олаві. Вшитки разом умовили ся спільно чекати на прибутя Миколая. Він нарешті їх одвідил в понеділок 19 грудня, коли юж ся смеркало. Місцем його зустрічі з дітми бив ресторан «Ґражка».
Сьвяти Миколай привюз тоти подарки, о котрих діти вспоминали в листах, писаних до нього від початку місяця.
Але він не такі скори бил обдарувати діти. Ой ні. Найперше діточки мусіли показатися з як найліпшой сторони.
Одно певне – вони ціли рік били дуже гречни! А до того іщи приготували виступ для гідного привітаня такого гостя. Діти навчили ся верши, співали коляди, весело і з гумором привитали Миколая. На кінец отримали довгоочікувани подарки. Пізнійше по кутиках з румянима личками вшитко озерали.
На сам кінец усьміхнени пішли з родичами домів…
Дякуєме тобі, Сьвяти Миколаю, і запрашаме знов до нас за рік!
