Олександр Маслей ■ ЛЕМКІВСКА СТОРІНКА ■ №17, 2015-04-26
В Лігницкому ліцею ім. Б.-І. Антонича 28 березня одбилося І виіздне засіданя Головной управи Обєднаня лемків (ГУ ОЛ).
На вступі засіданя голова ОЛ Еміль Гойсак привитав зібраних, пояснюючи вагу засіданя і місце, в яким оно ся одбиват. Причину, чому власно в тим місци, пояснив так: «Тому, што ми напередодні ганебной річниці, а на Лігницку землю трафила найвекша кількіст вигнаних Акцйом „Вісла” з рідной землі лемків».
Голова ОЛ Е. Гойсак і члени ГУ ОЛ сердечно привитали паню директор Анну Гаврильчак-Маланьчак, дякуючи єй за поміч в приготуваню першого виіздного засіданя.
Наступні голова представив програму засіданя і піддав єй під голосуваня зібраним. Програму затверджено через акламацію (прийняття чи відхилення зборами тієї чи іншої пропозиції без підрахунку голосів, на основі реакції учасників — ред.).
В програмі било: представліня й омовленя фінансового і мериторичного справозданя за 2014 рік і його затверджиня ГУ ОЛ; справозданя з виконаня проектів за 2014 р.; стан приготуваня до ХХХІІІ «Лемківской ватри» в Ждини; спітканя з меншинами національнима Лігницкой землі; спітканя з головами гуртків на Лігниччині; пропозиції і омовленя пляну ІХ Зїзду ОЛ; справи ріжни.
Голова ОЛ попросив паню Ксеню Довган про представліня звіту фінансового за 2014 рік. Зібрани по запізнаню ся і дискусий над білянсом, рахунками прибутків і втрат та омовленю справозданя фінансового і мериторичного, одноголосно приняли справозданя, уділяючи управі ОЛ абсолюторії.
Довга дискусия перешла над проектами на 2015 рік та іх фінансуваньом. Звернено увагу, што організація «Руска Бурса» в Горлицях, яка має приблизно 20 членів, дістає майже два раз більше гроши на діяльніст, ниж ОЛ, яке гуртує майже 1200 членів! Та не лем ОЛ є ту відокремлене, – звернув увагу Е. Гойсак. Менше дофінансуваня дістают, наприклад, Музей лемківской культури в Зиндранові, «Лемко-товер», хоц веце роблят… Наочно видно штучне підтриманя державом «вибраних». Не рахуючи того, як тота організація ся розчислят. Голосно било на форах інтернетових в минулим році. ОЛ за 20 ґроши мусіло звернути цілу дотацію за програму. «Кичері» обіцяли, та не дали, а «Руска Бурса» в Горлицях може розчисляти ся штири роки до заду, даючи звіт «дістали-зме 1 000 000 зл. і видали-зме 1 000 000» і є принято…
Дальше омовлено реалізацію програми ХХХІІІ «Лемківской ватри» та інших програмів, яки реалізує ОЛ. Довша дискусия била над програмом «Спітканя з Лемківщином». Пан Юрко Лабівскі слушно зауважив, што програм є використани лем на Лемківшині, а повинен бити реалізувани веце там, де лемків переселено.
В дальші частині на засіданя прибули представники нацменшин з Лігниччини, в тим: німецкой – Юрген Ґретсхел, ромской – Мірослав Димітрак, жидівской – Анна Лазарек, а братню організацію ОУП репрезентували Богдан Пецушок і Юрій Павлище
Кожна з меншин представила свої проблеми і біжучу діяльніст. Найбільш цікавий бил виступ представника німецкой меншини, який розповів дуже форматову історію Лігниці, мало знану вшитким присутнім.
По спітканю вшитки присутні перйшли під пропамятну дошку, присвячену жертвам Акції «Вісла». Заступник голови ОЛ Адам Вєвюрка коротком передмовом обяснив присутнім причини і наслідки Акції «Вісла». Складеньом квітів і запаліньом свічок та хвилином мовчаня присутні віддали честь офіром ганебной акції.
Пізніжше, по попращаню шановних гості, ГУ ОЛ заняла ся дискусийом над проведеньом ІХ Зізду ОЛ та справами ріжнима організації.
Дуже місця заняла справа обходу 120-ї річниці від дня народжиня Єпіфанія Дровняка та науковой конференції, присвяченой тій річниці. Пані Наталя Гладик детально представила проблеми Музею народного в Новім Санчі, який забил о тим, бо то юж лемко, а не «польскі знаменити маляр» має річницю. І музей певні тому юж єй не видит…
Обесідувано ряд ріжних заходів про активізацію лемківского середовища і співпрацю з ріжнима лемківскима організаціями. На тім перше історичне виіздне засіданя ГУ ОЛ закінчено. ■
