Олександр Маслей ■ ЛЕМКІВСКА СТОРІНКА ■ №11, 2013-03-17
В суботу 2 березня в домівці ОЛ в Горлицях одбилося перше поз’їз-дове засіданя поширеной Головной управи ОЛ. Засіданя відкрив голова ОЛ Штефан Гладик (по його пропозиції про порядок засіданя і переголосуваня його през управу). Ш. Гладик пригадав тих, яки від нас одишли: Анатоля Кобеляка, Ярослава Гайдукевича, Штефана Дупляка і Штефана Гованьского, яких вшанувано хвилином мовчаня.
Головним тематом засіданя бив звіт фінансовий президії за глонішний рік, звіт з перепроваджених проектів і план праці на 2013 рік.
Голова Ш. Гладик детально обесідував фінансови справи, поодиноки проекти і справи, пов’язани з фінансами ОЛ. Головна управа приняла звіт фінансовий за глонішний рік і уділіва абсолуторюм президії.
Про проекти і іх реалізацію бесідували відповідальні за поодиноки проекти, про Лемківску ватру звітували Еміль Гойсак, Наталя Гладик, Василь Шлянта і голова Ш. Гладик. Про діяльність Центру культури ім. Б.-І. Антонича і заходи центру – Н. Гладик.
Члени президії поінформували ГУ про ріжні справи і події, в яких ОЛ взяло участ.
Богато часу занял розподів задань для членів ГУ і визначиня термінив реалізації, тим чином вшитки члени ГУ мают свою ділянку, заданя і термин, з яких їх розчислит ГУ. Тото кус одтяжит президію і поможе зосередити ся на важливих річах.
Голова ОЛ запросив на засіданя редактора «Ватри» Петра Шафрана і заложителя фундації освітовой при ОЛ Івана Криницкого.
Члени ГУ ОЛ дістали інформацію про проблеми квартальника і довідали ся детальні, як діє фундація.
Ш. Гладик поінформував про план інвестиції на ватряному полі. Дале обесідувано справи Лемківской ватри, пропозиції і детальни зміни в організуваню єй, переважно ричи, яки «куліют», штоби і іх поправити.
Обесідувано денекотри потрібни за якиси час зміни в статуті.
Члени управи передали інформацію зо своїх регіонів. Ш. Гладик просив про більшу активніст тих осередків.
Обговорено справу поверненя вінєти на Лемківску сторінку «НС», дискусії не било би кінця, ГУ ОЛ приняла постанову, што лишат тоту справу редакторові відповідальному і голосуваням – при більшости голосів «за» – покінчено дискусію.
В пункті справ ріжних, Ш. Гладик обесідував справи спільной комісії при МАіЦ і пропозиції змін в єй діяню, пропозиції співпраці з організаціями – членами СФУЛО.
Обговорено плян видавничий ОЛ і пропозиції на наступни роки. В дискусіях хпало дуже цікавих пропозицій што до змін в діяню і в проектах.
Обрано старосту Лемківской ватри – Петра Чухту. Ватра в тим році буде проходила од 19 до 21 липня.
Засіданя покінчено надійним багажом справ дла кожного члена ГУ ОЛ. ■
